بەهمەن عومەر

من بەهمەن عومەر لە دایکبووی ١٩٩٣ ی شاری سلێمانیم, لە ئێستاشدا دانیشتووی شاری سلێمانیم و هەر لەمنداڵییەوە حەز و خولیای وێنەکێشان و سکێتچم هەبووە و هەرکات کاغەزێکم بهاتایە بەردەست یان ئەوەتا وێنەیەکم تیا دەکێشا یان ئەوەتا نوسین و شکڵی جۆراوجۆرم تیا دروستدەکرد ، لە کاتی ڕۆشتن بۆ قوتابخانەدا دوکانێک لەسەر ڕێگا هەبوو هەموو ڕۆژێک دەچووم دەفتەر وێنەیەکم دەکڕی تا لەکۆتایدا خاوەن دوکانەکە بەتەواوی بێزاربووو لێم و بڕیاری دا چیتر دەفتەر وێنەم پێنەفرۆشێت چونکە پێی وابوو دینارە ئاسنەکەم بدەمە خواردنێک باشترە.

یەکێک لە خۆشترین ساتەکانم ئەو کاتەبوو کە بۆیەکەم جار کۆمپیتەرم بەکارهێنا بە تایبەتی ئیشکردن بە بەرنامەی فۆتۆشۆپ و هەستم دەکرد خۆم دۆزیوەتەوە و ئەمە ئەو ڕێگایەیە کە پێویستە بیگرمە بەر بۆ بەرەو پێش بردنی حەز و خولیاکانم لە تەمەنی ١٦ ساڵییەوە دەستم کردووە بە کاری گرافیک دیزاین بەڵام بەهۆی خوێندنەوە نەمدەتوانی گرنگی تەواوی بدەم و بەشێوازێکی پچڕ پچڕ خەریکبم هەروەها بەهۆی نەبوونی سەرچاوی زمانی کوردی بەرچاوڕۆشنییەکی باشم لە پیشەکەدا نەبوو.

لە قۆناغی شەشدا نمرەی ٩٦.٥ م بەدەستهێنا و لە بەشی ئەندازیاری بەنداو وەرگیرام لەگەڵ خوێندنی زانکۆدا پەرەم بە کاری گرافیک دیزاین، وردە وردە هەستم دەکرد هیچ حەزێکم بۆ ئەو بەشە نییە کە لێی وەرگیراوم و ڕێگرە لەوەی لە گرافیک دیزایندا هەنگاوی زیاتر بنێم ، تا ئەو کاتەی گەشتمە دوڕیانی ئەوەی یەکێکیان هەڵبژێرم یان خوێندنەکەم لەو بەشەی هیچ حەز و داهاتوویەکم تیایدا نییە، یاخود ئەو حەز و خولیایەی گرافیک دیزاین کە شەو و ڕۆژم بۆی تەرخانکردووە، دەرئەنجام گرافیک دیزاینم هەڵبژارد و خوێندنەکەم وەستاند تا ئەو کاتەی لەدەرفەتێکدا بچمە دەرەوەی وڵات بۆ خوێندنی گرافیک دیزاین.

دوای وەستاندنی خوێندن لە زۆرێک چاپخانە و کۆمپانیا و دامەزراوە هەم بەدەوام هەم بە ئۆنلاین کاری دیزاینم کردووە و لە ئێستاشدا لەبواری فێرکاری و هەندێک جار بەشێوازی فریلانس کاری دیزاین دەکەم.

لە ماوەی چەند ساڵی ڕابردودا یەکێک لەو بۆشاییە گەورەی لە پیشەی گرافیک دیزاینی کوردیدا هەستم پێکردووە نەبوونی سەرچاوەی پێویستی گرافیک دیزاینە هەرچەندە لە کوردستان لە هەندێک زانکۆ و پەیمانگادا بەشی گرافیک دیزاین هەیە یاخود وەک وانە دەخوێندرێت بەڵام لەئاستی پێویستدا نییە و خوێندکار ناتوانێت بەهۆیەوە فێری گرافیک دیزاین ببێت و پێویستی بەوەیە لەسەرچاوەی دەرەوەی خوێندنەوە فێری ببێت و بچێتە ئاستێکی باش.

بڕیاری دانانی کتێبی گرافیک دیزاینیش ئەو کاتە دەستی پێکرد دوو ساڵێک لەمەوبەر کتێبخانەکان دەگەڕام بۆ کتێبێکی کوردی تایبەت لەسەر گرافیک دیزاین ، لە هەردوو شاری سلێمانی و هەولێر زۆر شوێن گەڕام و دەستم نەکەوت ، دواتر بێئومێدوم کتێبێک بەزمانی کوردی لەکتێبخانەکاندا بوونی هەبێت و بەم هۆکارەش بڕیاری هەنگاوە مەزنەکەم دا ئەویش خۆم یەکەم کتێبی گرافیک دیزاین دابنێم بۆ کوردزمانان و پێشکەشی کتێبخانەی کوردی بکەم، کە سوپاس بۆ خوا لە سەرەتای ئەمساڵدا بەچاپ گەشت و لەماوەیەکی کەمدا زیاتر لە ٣٠٠ ژمارەی لێفرۆشراوە کە بێگومان گەر بەهۆی ڤایرۆسی کۆرۆناوە نەبوایە زۆر زیاتریشی لێدەفرۆشرا ئەویش بەهۆی ئەو جۆش و خرۆشەی گرافیک دیزاینەری کورد و خوێنەری کورد بینیومە بۆ هاتنەکایەی یەکەم کتێبی تیۆری تایبەت بە فێربوونی گرافیک دیزاین.

ئامانجم لەم کتێبە بەرەو پێشبردنی پیشەی گرافیک دیزاینە لە کوردستاندا بەشێوەیەک هەر فێرخوازێک لەکاتی دەستپێکیدا بەهۆی ئەم کتێبەوە گرافیک دیزاین بناسێت و بەرچاوی ڕۆشن بێت لەم جیهانە قوڵەی گرافیک دیزاین، هەرچەندە من ئەم کتێبەم بۆ ئاستی سەرەتا داناوە بەڵام لەو فیدباکانەی پێمگەشتوەتەوە گرافیک دیزاینەرە پێشکەوتووەکانیش توانیویانە لەم کتێبە سودمەندبن و زۆرێک لە بابەتەکانی تازەبێت بۆیان، کە بێگومان هۆکاری ئەمەش ئەوەیە زۆربەی گرافیک دیزاینەری کورد بەهۆی نەزانینی زمانی دووەم و نەبوونی سەرچاوەی فێربوونی کوردی زیاتر بایەخی بەلایەنی پراکتیکی داوە، ماوەی ساڵ و نیوێک خەریکی دانانی کتێبی گرافیک دیزاین بووم لەو ماوەدا هەستم دەکرد من خەریکم جیهانێکی فراوانی گرافیک دیزاین بەسادەیی لەناوکتێبێکی ٣١٤ لاپەڕەیدا کۆدەکەمەوە و ئەزموونی چەند ساڵەم بخەمە سەر کاغەز لەگەڵ ئەوەشدا هێشتا پێم وایە حەقی تەواوەەتیم بە گرافیک دیزاین نەداوە و هەم پێویستە لەچاپەکانی دواتردا زیاتر کتێبەکە بەرەو پێش بەرم هەم بیگەیەنمە ئاستێک وەک مەنهەج بەکاربهێندرێت.